पाकिस्तानचे कट-कारस्थान सुरूच!

जित्याची खोड मेल्याशिवाय जात नाही म्हणतात. तसंच काहीसं पाकिस्तानचं झालं आहे. पाकिस्तान आपल्या कटकारस्थानाच्या सवयी सोडायला तयार नाही. आंतरराष्ट्रीय व्यासपीठांवर तो स्वत:ला स्वच्छ सिद्ध करण्याचा आणि सर्व दोष भारतावर टाकण्याचा सतत प्रयत्न करत असतो. आपलीच टिमकी वाजवून सहानुभूती मिळवण्याचा प्रयत्न असतो. पण प्रत्यक्षात स्वतःच भारताच्या खोड्या काढत असतो. सतत काही ना काही कुरापती काढत असतो.  अजूनही त्याचे सीमावर्ती भागात घुसखोरी करून भारतात दहशत पसरवण्याचे सर्वतोपरी प्रयत्न चालले आहेत.  आता त्याने ड्रोनच्या माध्यमातून स्फोटक पदार्थ भारताच्या हद्दीत टाकण्याचा नवा मार्ग शोधला आहे.  याचे ताजे उदाहरण म्हणजे पंजाबमधील गुरुदासपूर भागात स्फोटके, पिस्तूल, काडतुसे आणि इतर उपकरणे असलेल्या थैल्या आढळून आल्या आहेत.

सीमा सुरक्षा दलाच्या शोध मोहिमेदरम्यान हा प्रकार उघडकीस आला.  शेतात दोन थैल्यांमध्ये स्फोटक साहित्य असल्याचे आढळून आले.  याआधीही काही वेळा पाकिस्तानातून येणारे ड्रोन स्फोटक पदार्थ टाकून गेल्याच्या घटना घडल्या आहेत.  काही वेळा सुरक्षा दलांवर ड्रोन हल्ले झाले आहेत.हल्ले करून ड्रोन माघारी गेले आहेत.  आता सीमा सुरक्षा दलाने ड्रोनवर लक्ष ठेवण्यासाठी अत्याधुनिक उपकरणांचा वापर सुरू केला असून, त्यामुळे त्यांच्या हालचालींवर अंकुश बसला आहे, मात्र तरीही या तंत्रज्ञानाचा सर्वत्र वापर होत नसल्याने पाकिस्तान त्याच्या कटात यशस्वी होताना दिसत आहेत.

पाकिस्तानच्या या कारवायांची कारणे लपून राहिलेली नाहीत.  पाकिस्तानी सैन्य सतत काश्मीरच्या बाजूने घुसखोरी करण्याचा प्रयत्न करत असते, त्यामुळे त्यांनी अनेकदा शस्त्रसंधीचे उल्लंघनही केले आहे.  शस्त्रसंधीच्या उल्लंघनाबाबत भारताने त्याला यापूर्वी अनेकदा कडक ताकीद दिली आहे, पण पाकिस्तान आपल्या सवयी सोडायला तयार नाही. काश्मीरची स्वायत्तता संपुष्टात आल्यापासून पाकिस्तानचा रोष लक्षणीयरीत्या वाढला आहे.  याबाबत त्याने जगभर फिरून तक्रार केली, मात्र कुणीच त्याचे काही ऐकले नाही.

याशिवाय काश्मीर खोऱ्यात सुरक्षा दलांच्या तत्परतेमुळे आणि सखोल शोधामुळे दहशतवाद्यांचे बहुतांश ठिकाणी उद्ध्वस्त करण्यात यश आले आहे.  स्थानिक लोकही त्यांना आता पूर्वीप्रमाणे थारा देत नाहीत.  जे लोक आणि संघटना दहशतवाद्यांना आर्थिक मदत करत होते, त्यांच्यावर कारवाई करण्यात आली आहे.  फुटीरतावादी नेत्यांच्या बँक खात्यांवर सतत नजर ठेवल्यामुळे पाकिस्तानातून येणारा पैसाही बंद झाला आहे.  अशा प्रकारे दहशतवादाला प्रोत्साहन देणे पाकिस्तानसाठी सोपे राहिलेले नाही.  घुसखोरीच्या घटनाही घडत नाहीत, कारण भारतीय लष्कर सीमेपलीकडून सुरू असलेल्या हालचालींवर सतत लक्ष ठेवून असते.  त्यामुळे तेथून ड्रोनच्या माध्यमातून असे उद्योग करण्याचा प्रयत्न केला जात आहे.

मात्र, सर्व दक्षता घेऊनही भारतातील दहशतवाद संपलेला नाही आणि या लोकांना जेव्हा जेव्हा संधी मिळते तेव्हा ते आपले षड्यंत्र निश्चितपणे पार पाडण्याचा प्रयत्न करतात.  ताज्या प्रकरणात जप्त करण्यात आलेल्या स्फोटकांच्या संदर्भात सीमा सुरक्षा दलाचे म्हणणे आहे की, लुधियाना न्यायालयात अशाच स्वरूपाचा बॉम्ब स्फोट झाला होता आणि दिल्लीच्या गाझीपूर फूल मंडीमध्येही स्फोट झाला होता.  म्हणजेच पाकिस्तानातून ड्रोनने सोडलेली स्फोटके आणि शस्त्रे यांचा वापर देशाच्या विविध भागांत होत आहे.  पंजाब  अनेक बाबतीत संवेदनशील राज्य आहे आणि सध्या तिथे विधानसभेच्या निवडणुका सुरू आहेत.  त्यामुळे तेथे काही विघ्न निर्माण करण्याच्या उद्देशाने ही स्फोटके नक्कीच टाकण्यात आली होती. यामुळे सीमा सुरक्षा दलाने अधिक सज्ज राहण्याची गरज अधोरेखित झाली आहे.-मच्छिंद्र ऐनापुरे, जत जि. सांगली